Categories: 娱乐

◤型过林文龙!◢《不懂撒娇》钻石笋盘『游生』背景大起底! 原来他就是毛舜筠的家明表哥! 网民: 也太迟才红了吧?

無綫4K劇《不懂撒嬌的女人》有久違的林文龍和宣萱回歸，另外王浩信和唐詩詠呢一對sweet到爆，角色同劇情都甚有口碑。不過播出前大家都估唔到，除了一眾主角外，飾演大老闆游生的袁文傑同樣人氣急升！成名於亞視的袁文傑高大有型，劇中角色甚為突出，得到唔少網民關注，依家一齊認識佢！

袁文傑《不懂撒嬌》游生搶戲

袁文傑喺《不懂撒嬌的女人》中飾演傲星集團大老闆游俊傑 (游生)，係宣萱及林文龍等人的上司，雖然出場時間唔多，不過每次登場都喺霸氣十足，強勢如Mall姐都要忌佢三分！劇中袁文傑大部分時間都喺西裝骨骨，身材高又健碩當然着得非常好睇，另外佢不時有去泳池游水的戲份，充分表現出佢自信的Body。呢個男配角，非常搶鏡！

同翟威廉撞晒樣

袁文傑憑《不懂撒嬌》人氣急升，原來佢同另一個同樣係亞視出身的現無綫藝人撞晒樣，就係翟威廉啦！事緣翟威廉早前喺FB分享一段趣事，原來佢姨媽都將佢同袁文傑撈亂咗！相似程度可想而知。

那些年亞視型男

1972年出生的袁文傑今年45歲，俊俏面孔加上189cm (6尺4寸) 的身高令佢外型非常出眾，在亞洲電視期間被稱為「亞視型男」。袁文傑1991年畢業於無綫藝員訓練班，後來轉到亞視發展其演藝事業，拍過《雪花神劍》、《情陷夜中環》等多部重頭劇，為亞視一線小生。

袁文傑當年同唔少亞視女星如萬綺雯、田蕊妮等合作，相信佢哋將來好大機會喺大台再合作……

露股浸溫泉

2008年時袁文傑同吳亭欣去咗日本東北部拍攝旅遊節目《愛在異鄉的季節》，佢為咗將日本傳統浸溫泉的風俗表達俾觀眾，入鄉隨俗，連底褲都唔着，全祼上陣，喺鏡頭前露出巨股，全心全意享受溫泉之樂。佢呢種為亞視出力不惜一切的心態，睇得出佢對每件事都要盡善盡美！

《家有囍事》個家明

1992年佢喺訓練班畢業冇耐，就拍咗套經典大作《家有囍事》，對手仲有張國榮同毛舜筠！而佢飾演的就係家明，即係毛舜筠個表哥，但唔知係咪導演見袁文傑太高大，鏡頭唔太夠位，全套戲連一個正面鏡頭都冇，唔係影住背脊，就係被侍應托盤遮住。但正正係咁，呢個冇樣睇的表哥，就留咗一個深刻印象俾觀眾！

兼職講波佬

袁文傑演員外仲有另一個身份，就係一個英超球會阿仙奴的忠實球迷，佢喺YouTube有一個名叫《傑出阿仙奴》的足球節目，分析阿仙奴每場波的嬴輸關鍵。大家唔好以為袁文傑識少少扮代表，《傑出阿仙奴》每集都幾乎長20分鐘，有晒數據分析，功課做到足。據知《不懂撒嬌》監製都係睇咗佢呢個節目，認為佢分析理性又夠霸氣，於是邀請佢演出「游生」一角！