【on.cc東網專訊】 無綫新劇《來自喵喵星的妳》搵嚟田蕊妮扮貓咪夠晒話題性，點知好戲在後頭，劇中飾演勇猛女警嘅胡定欣，為咗查案無所不用其極，除咗扮大肚捉賊，嚟緊仲會着上超性感馬甲示人，myTV SUPER fb連續兩日上載咗兩段胡定欣喺劇中性感演出嘅絕密片段，睇到一班網民都話流晒鼻血。

▲妙妙都話正！
四腳蛇掉咗入件衫度

▲因為隻四腳蛇掉咗入胡定欣件衫度，於是佢就要除衫整番隻四腳蛇出嚟。

第一段胡定欣先嚟唔知做咩係咁尖叫，仲伸隻手入去件衫度起勢咁摷，摷摷吓仲除埋衫添。咦！點解胡定欣會着兩個Bra嘅，唔通會舒服啲？原來呢個絕密片段，係嚟自星期二播出嘅第二集，劇情講到胡定欣同上司蔣志光為咗捉拿花名「四腳蛇」嘅神偷，偽裝成兩公婆上產前練習班，好快「四腳蛇」就露出破綻，於是胡定欣就同「四腳蛇」展開追逐戰，點知追到入後巷嘅時候，畀「四腳蛇」搵到一樣犀利武器，一條活生生嘅真．四腳蛇！佢仲好唔人道咁將條四腳蛇掉咗入胡定欣件衫入面，搞到喺劇入面好驚小動物嘅胡定欣即刻投晒降，電視播到呢度就完咗。

戴足兩個bra

▲一除！嘩！定欣係咪着錯咗阿婆個Bra bra呀？

▲但更奇怪嘅係點解佢Bra下面好似仲有個Bra咁嘅？

▲於是，佢再除，吓！真係仲有喎？

▲不過都唔使失望，都騷到定欣條事業線㗎！

而胡定欣之後點做，再喺絕密片段度交代番。首先佢伸隻手入件衫度想捉番隻四腳蛇出嚟。但係胡定欣捉極都捉唔到，唯有除咗出面件衫，淨番個Bra，頭先都講過定欣扮緊大肚婆上產前練習班，為咗營造豐富嘅身材所以咪帶兩個Bra囉。胡定欣除淨個Sport bra係咁跳，網民就留言話自己對眼都跟住佢係咁跳，仲有網民話胡定欣身材咁好，使乜帶兩個bra呀！至於呢條片係點流出嘅呢？咪就係走甩咗嘅神偷「四腳蛇」偷拍㗎囉。

▲而邊個偷拍完之後再流出呢條片嘅呢？

▲之唔係神偷「四腳蛇」囉，各位網民今次真係要多謝佢啦。

好嘢唔怕晒

第二條片一開始胡定欣就用「喵喵星話」唱咗段音樂，本來都冇咩特別，突然鏡頭一轉胡定欣就喺間房度試衫照鏡，佢攞住件黑色超性感連身馬甲，佢話：「點着呀？」之後佢自信番晒嚟，佢仲自讚：「我前凸後翹，又有長腿，怕咩呀！」果然胡定欣就換咗套衫出嚟，不過佢就閃閃縮縮咁捉實件外套，驚人睇蝕咁。點知鏡頭左面突然殺咗四個妙齡女郎出嚟，仲對住胡定欣笑添！激到胡定欣即刻豁出去，鬆開外套挺胸收腹，大騷事業線加黑絲長腿，睇到網民眼都凸埋，勁讚胡定欣真人不露相，一啲都唔輸蝕畀嗰四個後生女！

▲唔止㗎，仲有一段正嘢要同大家分享。胡定欣拎住呢件咁性感嘅黑色馬甲係想點呢？

▲黑絲長腿，想引死人咩？

▲不過定欣好似有啲怕醜喎，捉到件外套實一實。

▲然後有幾個後生女似笑非笑咁望住定欣。

▲佢哋嘅眼神幾咁鄙視。

▲哈！都話女人唔激得㗎啦！定欣即刻鬆開外套挺胸收腹！大騷事業線！

▲定欣心諗：咪以為老娘冇嘢show呀。（設計對白）
史高拔13年後再出場

另外，有網友留意到劇中蔣志光飾演嘅史高拔，同03年劇集《棟篤神探》蔣志光嘅角色一樣叫史高拔，又一樣係警察，不過03年史sir仲喺西九龍重案组A組嘅高级督察，13年後佢已經升咗職做刑事偵缉科總督察，唔知莫探員又會唔會客串出場呢？

来源: on.cc

Like Rojaklah Facebook！不出门也能知天下事～～