有指黃宗澤本來今年3月同日模Jun拍拖後，大家好啱嘴形，就算黃於沙田寓所附近嘅酒店，租房供築愛巢同居，可惜二人經常分隔兩地，見面漸少致感情最後無疾天終！據知，黃宗澤今次呢位新歡Twin姐係中國、印尼混血兒，而且來頭好勁，報道指Twin姐約30歲，於澳門某賭場高層，更係菲律賓長灘島嘅獨家賭場生意嘅C.O.O.(營運總監)！據知，二人喺年前由友人介紹認識，初時以姐弟相稱，但其實二人互相有好感，黃宗澤不時口花花氹對方，而Twin又經常抽空由澳門來港，專誠去黃宗澤間蠔吧探對方，二人亦匿喺VIP房撐枱腳！

報道指Twin係醒目女，得知黃宗澤係孝順仔，為博對方好感，Twin實行「奶奶政策」，經常買禮物送俾黃媽媽，氹得長輩不知幾冧！奶奶政策得米後，Twin同黃宗澤打得更火熱，二人不時selfie晒甜蜜合照，據知黃宗澤身邊朋友，都見怪不怪！

Twin姐除了係女強人之外，其實亦天生一副明星相，而且身材惹火，據知佢於00年曾經做過model，而甚有生意頭腦的她，亦有搞護膚品代理生意，贊助唔少藝人朋友，所以於圈中人脈甚廣，與李彩華、姚子羚、趙學而、周家蔚同嚴淑明等私交甚篤。問到新戀情，黃宗澤例牌否認：「呢個係我識咗十幾年嘅契家姐嚟，完全係看圖作文啦！」