【Pokémon GO！】觀眾去晒做訓練員《一屋老友記》收視跌

Pokémon GO推出後，無綫黃金時段嘅劇集收視都受影響，幾乎全綫下跌。（互聯網圖片）
全球熱爆嘅手機遊戲Pokémon GO喺香港上架第3日，大家都好投入做精靈訓練員，甚至有公司爆到全公司放一日假畀啲員工專心捉精靈，然後條街又忽然熱鬧咗好多，大家運動增加咗，同朋友嘅交流都多咗。

多咗Pokémon娛樂大家，咁啲傳統娛樂——即係電視同電影嘅捧場人次又點呢？冇錯，係跌咗嘅。                                                                                                      
先睇無綫前日（即係Pokémon GO推出首日）嘅收視，以黃金時段嚟計，跌幅最大嘅係《愛‧回家之八時入席》，前晚只錄得23.1點（約149.9萬觀眾收看），同上星期同時段嘅收視比較，跌咗0.7點，即係流失咗約4.5萬觀眾。
至於資訊節目《東張西望》只得17.7點收視（約114.8萬觀眾收看），錄得0.3點跌幅，即少咗1.9萬觀眾捧場；而陳豪主演嘅《完美叛侶》，前晚亦跌咗0.3點，收視錄得22.6點（約146.6萬觀眾收看）。                                                                                                               
到噚日，《東張西望》微升上番18點收視（約116.8萬觀眾收看），但相比上周同時段，就跌咗1.6點，流失咗10.3萬觀眾；而《愛‧回家八時入席》就維持23.1點不變。《完美叛侶》亦連續錄得跌幅，收22點（約142.8萬觀眾收看），跌2點，流失近13萬觀眾。                                                                                                                                                                                                            
大家最想知嘅應該係《一屋老友記》同《街頭魔法王之魔王之王》有冇受影響，兩者先升後跌，前日微升，分別升0.2同0.7點，但到噚日，就分別跌1.5同0.3點，《一屋老友記》噚晚得184萬人捧場，流失咗9.7萬觀眾；《魔王之王》就跌穿20點收視線，錄得19.6點（約127.2萬觀眾收看），跌0.3點，流失1.9萬觀眾。                                                                                                                                                         
既然大家都唔「愛回家」，咁戲院方面又點呢？以噚日為例，入場人次只有62,353人，票房得約414萬港元，相比起上星期二（19號）嘅85,255人次、約556萬港元票房嘅成績嚟睇，少咗22,902人次、142萬港元票房。                                                                                                      
Pokémon GO熱潮襲港大人小朋友都忙於捉精靈，根據Hong Kong Box Office Ltd的資料顯示，前日（星期二）的入戲院的人次跟上星期二比較確有下跌，跌咗26.8%，而上星期四有兩荷李活電影上映，有人相信是因為Pokémon效應，戲院商會副主席崔顯威昨日接受電話訪問時不排除這個可能，他說：「我哋未實際瞭解過，不過我睇返嗰數係跌咗，你咁講可能會有，呢兩日嘅事大家都低頭，呢個熱潮有影響，可能飲食都會喎。                                                   

今朝望整個票房對比禮拜一都唔係高好多，因為一般星期一個票房都會跌。」他相信可能會持續一段日子。

来源：appledaily