藝人胡杏兒與丈夫李乘德婚後各有各忙。李乘德日前為了出席朋友婚宴到了台灣，而胡杏兒則在內地宣傳舞台劇。二人雖然分隔兩地，不過搞鬼嘅杏兒，就趁做完嘢之後靜靜雞去咗台灣送驚喜，仲直踩李乘德朋友嘅婚宴向老公送吻，不過就因為咁嚇親老公，搞到李乘德嚇到面都紅晒。

唔知係老婆仍一面冧樣

觀乎李乘德上載IG嘅短片，杏兒「突襲」李乘德前，李乘德喺酒席度談笑風生，身邊仲坐咗名靚女，然後胡杏兒就突然出現，仲慢慢行去老公身後兼二話不說咀落老公度。雖然杏兒「出手」之前，李乘德身邊嘅朋友已經起哄，但杏兒初初錫落去嗰時，喺夜場見慣風浪嘅李乘德雖然未為意呢個係自己老婆，但仍露出一副冧樣，仲側起個頭，好似想人哋錫多佢一啖咁。

嚇到成個彈起

不過過咗幾秒之後，李乘德驚覺送吻嗰個係老婆，佢即刻好大反應，嚇到成個彈起，但仍不忘伸手攬攬愛妻。而杏兒呢個時候亦都笑晒咁，同老公又攬又錫，而在場嘅人士當然就係起哄啦！

瘋狂玩自摑

同老婆纏綿完一輪後，塊面紅晒嘅李乘德突然起勢玩自摑，仲話：「我應該叫佢唔好錫我，因為我結咗婚。」呢個時候，李乘德唔單止面紅，仲連頸都紅埋，感覺上有啲激動。然後再上前同杏兒攬攬，而呢一刻，佢哋嘅朋友除咗笑呢對夫婦好可愛，仲笑李乘德塊面
紅晒添。條片最後亦都以李乘德嘅深情一吻作結。

雖然畀老婆突襲嚇一大跳，但李乘德事後依然將條片開心些牙去社交網，仲留言：「李太提早完成工作之後，飛咗去台北兼送咗一個意外驚喜畀我；雖然估唔到，但真係好開心，因為我都一段時間冇見佢。」

喺杏兒突襲之前，李乘德個樣已經有啲呆呆哋。

當杏兒錫落去嗰陣，當時未發現送吻者係老婆杏兒嘅李乘德仲好淡定。

佢側起個頭，好似想人哋錫多佢一啖咁。

之後，佢發現送吻者原來係老婆時，嚇到成個彈起，咩事咁驚先？

然後，杏兒勁肉緊咁錫落老公度。

兩個攬到哩。

而杏兒就露出勝利笑容喎。

之後，李乘德開始自摑。

佢一面自摑，一面話應該拒絕呢個吻。

唔通係補鑊？

然後兩位主角再次上演深情擁抱。

男主角再獻上一個情深擁吻，然後條片就完咗。

来源：hk.on.cc/