由去年12月太陽娛樂老闆洗米華(周焯華)與Mandy Lieu世紀拖手，令正印Heidi陳慧玲下定決心離婚，而Mandy亦火速宣佈為周家陀第二胎，短短數月已有相當戲劇性的變化。之前曾傳洗米華一直努力箍煲，拒簽紙離婚，但Heidi去意已決，亦下定決心獨力照顧大女梓潼及10個月大孻女善潼，認真堅強。

《蘋果》最新收到消息指，洗米華與Heidi已辦妥離婚手續，Heidi正式與「洗米嫂」之名一刀兩斷。家陣洗米華亦樂得做空中飛人，一個月有一半時間留喺倫敦陪Mandy。但Mandy始終係第三者，周家上下對之仍未能接納；加上Heidi與周家關係密切，即使與洗米華分手，仍視周父如老爺般孝順，要入門仍然有難度。

不過咁，懷孕約9個月嘅Mandy，腹中性別一直成謎。如果今次一索得男，「入門」籌碼自是大大增加。今日有周刊報道指，Mandy呢胎係仔，仲話佢喺上周由洗米華陪伴下，喺英國誕下囝囝，為周家再添慈姑椗。報道更指原定七月先至返港定居嘅Mandy，提早於下月就返港，更有意入住大潭豪宅。對於Mandy上周已生倫敦生B仔一事，《蘋果》就問咗Mandy Lieu經理人，佢哋例牌否認：「唔係事實唔回應，未收到通知。」

周刊報道引述知情者話Mandy生咗啦，但係據Mandy身邊友人透露，其實Mandy仲未生得，預產期係本月尾下月初，今次佢都會揀水中自然分娩生，但應該唔會喺上胎嘅The Portland Hospital生，Mandy仲為B仔照過4D超聲波，五官輪廓都似佢混血輪廓。

Mandy為洗米華兩年抱兩、湊夠「好」字，洗米華亦已經步署晒安頓Mandy同一對子女返港定居，女友身份隨時再升一級，應該「新洗米嫂」正式坐正。

来源：苹果日报