台庆颁奖礼，其实同办(扮)工室政治一样，都系游戏一场。所以罗家英戥爱妻汪明荃拎唔到视后感不值丶於微博暗示系权斗问题——自前无綫电视制作部戏剧制作总监梁家树走後，其派系已树摇叶落:「你明白的。」家英哥对阿姐讲。似乎未明白的，是家英哥。

不过咁，只得两套剧叫系做「女主角」(严格而言系第二女主角)嘅胡定欣捧走视后系咪好事呢？问得呢个问题，当然想讲唔系好事，仲忽然拉埋杨怡落水喎。

昨日有周刊报道指，胡定欣封视后之後，杨怡即时向公司传话，话明唔想再同佢喺工作上有来往。历史又回到2010年《万千星辉颁奖典礼》，多得TVB捕捉到杨怡「疑似藐」身旁嘅胡定欣，唔单止同佢冇偈倾，神情仲有啲藐藐地，疑似爆咗句：「你话博咩呀？着到咁！」

不过咁，盛传有离心嘅杨怡，之前回应传媒问佢点睇自己得奖机会时，就话自己今年成绩唔算突出，反而撑胡定欣有好大突破，想对方拎奖咁话喎。讲真嗰句，早已有传下年初约满嘅杨怡，一心北上掘金，唔肯「加监」续约，所以依家都ok清闲……既然系咁，边个拎视后对佢而言，其实都已经唔重要，咁又何来传话唔想同胡定欣合作呢？所以，呢个传闻，有啲伏。

其实胡定欣同杨怡一样，都系先拎飞跃女艺员丶再摘最佳女配角，然後跃升视后嘅「大满贯赢家」，其演技亦明显成熟不少，只系同主角欠了点缘。但讲到缘，相信31岁嘅锺嘉欣感受更深，一向乖乖女，又同公司续咗8年长约，做到39岁都继续系无綫人——但今年视后，都系冇佢份。

来源：苹果日报